Nuacht | Irish Television Channel, Súil Eile | TG4 Skip to main content
Menu

Nuacht TG4

14 LÚNASA 2019 : 18:25
Comharthaí dátheangacha péinteáilte i nGaoth Dobhair

Dhiúltaigh an comhairleoir contae neamhspleách i gCo Dhún na nGall, Mícheál Cholm Mac Giolla Easbuig, cáineadh a dhéanamh ar cibé duine dó daoine a phéinteáil an leagan Béarla de logainmneacha ar chomharthaí bóthair i nGaeltacht Ghaoth Dobhair le déanaí.


In agallamh le Highland Radio ar maidin, fiafraíodh don chomhairleoir an raibh aon bhaint aige leis. Dúirt sé nach raibh aon tábhacht leis sin, ach nach ábhar iontais é go bhfuil an leagan Béarla clúdaithe le péint sa Ghaeltacht. 

"Is léir go bhfuil cinneadh déanta ag duine nó daoine gur mhaith leo ráiteas a dhéanamh in éadan comharthaíocht dátheangach sa Ghaeltacht. Tá sé tábhachtach go n-éisteodh an rialtas le mian an phobail - sé sin nach dteastaíonn comharthaí bóthair i mBéarla sa Ghaeltacht," a dúirt an Comhairleoir Mac Giolla Easbuig"


Dúirt an Comhairleoir Mac Giolla Easbuig go bhfuil béim ar thurasóireacht chultúrtha agus go dteastaíonn ó chuairteoirí ó thar lear an Ghaeilge a fheiceáil ar chomharthaí. Dúirt sé gur masla atá ann ag an rialtas logainmneacha na hÉireann a aistriú go Béarla. "Dá mbéidís i ndáiríre faoi chosaint a thabhairt don Ghaeilge, bheadh na leaganacha Gaeilge ar gach gaireas treoraithe satailíte agus ar gach léarscáil. Is mór an trua go bhfuil Comhairle Chontae Dhún na nGall agus an Stát ag leanúint de bheith ag brú Béarla ar an phobal."
D'fhiafraigh Highland Radio de an gcáinfeadh sé an t-iompar agus dúirt sé nach gcáinfeadh sé a léithéid d'iompar sa chás áirithe seo. 


Le seachtain anuas, tá péint curtha ar an leagan Béarla de 'Leitir Ceanainn' ar roinnt comharthaí bóthair oifigiúla i gceantar Gaeltachta iarthar Dhún na nGall. 

Fógraíocht