Preas

Tús Curtha leis an Scannánú ar an nGearrscannán ón scéim Céim Eile: Babaí Brain i mbun léirithe i gConamara

16.10.24

^{Pic: Ciarán Charles Ó Conghaile, Brídín Ní Mhaoldomhnaigh agus Nikolaj Feifer}
 

Tá an-áthas ar TG4 a fhógairt go bhfuil tús curtha le scannánú ar Babaí Brain an tseachtain seo, an chéad scannán atá tagtha chun cinn as a thionscnamh nua chun daoine cumasacha a bhfuil Gaeilge acu a chothú – Céim Eile. Is ar bhaile álainn an Spidéil i gConamara a bheidh an léiriúchán iontach seo ar bun agus is ócáid shuntasach é do thionscal na scannán Gaeilge.
 
 
Babaí Brain
Scannán bríomhar, nua-aimseartha is ea Babaí Brain atá dírithe ar dhaoine atá idir 18 agus 35 bliana d’aois. Cuirtear síos air mar ‘scannán rómánsúil do mhná’ agus táthar ag súil go meallfaidh an scéal lucht féachana óg i bhfianaise na gcarachtar tarraingteach agus na dtéamaí comhaimseartha atá ann. Is í Brídín Ní Mhaoldomhnaigh a scríobh Babaí Brain agus is í a bheidh sa bpríomhpháirt freisin agus táthar ag súil go gcuirfidh an scannán daoine nua mar aon le dearcadh nua ar scáileán na Gaeilge.
 
Fíbín Media atá i mbun léirithe ar an scannán agus is é Ciarán Charles Ó Conghaile a bheidh á léiriú. Ní scéal beag ar chor ar bith é gurb é Nikolaj Feifer stiúrthóir an tionscadail. Is fearr aithne air as an tsraith mhóréilimh Baby Fever a chruthú agus a stiúradh do Netflix. Tugann a rannpháirtíocht gné idirnáisiúnta spreagúil don léiriúchán, ag fí tallann áitiúil le saineolas domhanda.
 
 

Maidir le Céim Eile
Is tionscadal ceannródaíoch é Céim Eile a sheol TG4, Fís Éireann agus an Ciste Craoltóireachta Gaeilge in 2022 tar éis an rath a bhí ar a gcomhiarrachtaí le scéimeanna Forbartha Drámaíochta Teilifíse Cine4 agus TG4/Fís Éireann. Is é aidhm Céim Eile ná an chéad ghlúin eile de scríbhneoirí agus de lucht déanta scannán a bhfuil Gaeilge acu a aimsiú, a fhorbairt agus a chothú, ag cur ardán ar fáil do dhaoine cumasacha atá ag teacht chun cinn.
 
 

Todhchaí Bhreá do Scannánaíocht na Gaeilge:

Tá TG4 tiomanta do thacaíocht a thabhairt d’ábhar Gaeilge agus é a chur chun cinn, agus is í an scéim Céim Eile an chéad chéim eile ina misean chun daoine cumasacha nua a chothú. Is léiriú é Babaí Brain ar chumas an tionscnaimh scéalta úra, dinimiciúla a chur os comhair lucht féachana na Gaeilge, agus cur le fás thionscal na scannán Gaeilge ag an am céanna.
 
Cuireann Céim Eile leis an mbunchloch atá leagtha cheana féin ag léiriúcháin rathúla Ghaeilge agus cuireann deiseanna ar fáil do dhaoine nua tabhairt faoi shaol na scríbhneoireachta scáileáin agus na scannánaíochta. Tá a dtiomantas do chothú na ndaoine sin léirithe ag TG4, Fís Éireann, agus ag an gCiste Craoltóireachta Gaeilge, ag cinntiú go ndéanfar forbairt leanúnach ar ábhar Gaeilge ar fud gach ardán.
 
Is éard a dúirt Máire Uí Choisdealbha, Eagarthóir Coimisiúnaithe TG4: “Tá lúcháir orainn go bhfuil an chéad léiriúchán ó Céim Eile ag teacht chun fíre le Babaí Brain. Tá sé i gceist leis an tionscnamh seo deis a thabhairt do dhaoine cumasacha a bhfuil Gaeilge acu, bíodh siad nua sa tionscal nó ag teacht chun cinn sa tionscal, a gcuid scéalta a insint, agus ní fhéadfaimis a bheith níos bródúla as an bhfoireann a bhí páirteach ann. Is tús maith leath na hoibre ceart é don scéim go bhfuil meascán de scríbhneoireacht úr, criú léirithe a bhfuil an-taithí acu, agus stiúrthóir idirnáisiúnta ar nós Nikolaj Feifer páirteach ann.”
 

Beidh an scannánú do Babaí Brain ar siúl an chuid eile den tseachtain i gConamara, agus táthar ag súil go n-eiseofar an bhliain seo chugainn é. Ó tharla gurb é seo an chéad tionscadal ó thionscnamh Céim Eile, tá an-chuid fuadair ag baint leis, agus táthar ag súil go mór leis na tionscadail eile a thiocfaidh as amach anseo.
 
 

Nótaí d’Eagarthóirí

• Is é Babaí Brain an chéad scannán ó Céim Eile, comhthionscnamh de chuid TG4, Fís Éireann, agus an Ciste Craoltóireachta Gaeilge.
• Fíbín Media atá i mbun léirithe, is í Brídín Ní Mhaoldomhnaigh a scríobh é, is é Darach Ó Tuairisg an Léiritheoir Feidhmiúcháin le Fíbín, is é Ciarán Charles Ó Conghaile atá i mbun léirithe agus is é Nikolaj Feifer (Baby Fever) an stiúrthóir.
• Tá sé mar aidhm le Céim Eile scríbhneoirí agus lucht déanta scannán a bhfuil Gaeilge acu a spreagadh, iadsan atá nua agus atá ag teacht chun cinn araon.