Coimisiúnú
Spreag
Sprioc-am d’iarratais chuig TG4 – Dé hAoine an 30ú Bealtaine 2025
Cuireann TG4, Fís Éireann agus Ciste Craoltóireachta Gaeilge Scáileáin Thuaisceart Éireann fáilte roimh iarratais ar mhaoiniú do thograí Gearrscannáin Anamúlachta Gaeilge. Tá muid ag súil go spreagfaidh an ciste maoinithe seo tograí anamúlachta Gaeilge, atá bunaithe ar coincheap agus scríbhneoireacht Gaeilge agus a thugann léargas ar scéalaíocht atá dúchasach agus samhailteach agus a léiríonn ábhar spéise agus eispéiris saoil ilghnéitheach an phobail Gaelach.
Táthar ag súil na gearrscannáin a cruthaítear a bheith léirithe ar ard chaighdeán agus ar fáil le dáileadh ag fleadh scannáin agus féilte maraon le bheith ar fáil le craoladh ar TG4 nó Cúla4.
Díreoidh an scéim ar chumas scríobhneoirí le Gaeilge a chothú i réimsí na hanamúlachta, agus deis forbartha a thabhairt do thallann nua le Gaeilge sa tionscail. Fáilteofar roimh iarratais ó fhoirne ina mbeidh:
- Scríobhneoir le Gaeilge in éineacht le Léiritheoir & Stiúrthóir le roinnt taithí
- Stiúrthóir le Gaeilge & Scríobhneoir le Gaeilge in éineacht le Léiritheoir le roinnt taithí
Beidh tacaíocht ar fáil do iarrthóirí faoi stiúir agus faoi mheantóireacht Animation Ireland Talent Academy agus cuirfear Léiritheoir Feidhmiúcháin ag obair le gach togra le comhairle a chuir ar fáil.
Tá súil idir 4 – 6 cinn de thograí a fhorbairt. Tograí idir 3 nóiméad agus 6 nóiméad ar fhaid.
Beidh súil le léirithe a beith críochnaithe agus seachadadh faoi tús Mí Márta 2026.
CINEÁL ÁBHAR
Fáilteofar roimh thograí Anamúlachta a bheidh ag díriú ar ceann den dá réimse seo:
- CÚLA4: Tá Cúla4 dírithe ar dhaoine óga idir aois réamhscoile go 13 bliana d’aois. Craolann cainéal Cúla4 gach lá ón 6am – 8pm agus tá fáil ar App Cúla4 am ar bith, áit ar bith.
Tá eolas breise ar fáil faoi Cúla4 ach teagmháil le siobhan.ni.bhradaigh@tg4.ie
- BLOC TG4: Is mol sóisialta é BLOC atá dírithe ar lucht féachana 18+ . Tá ábhar BLOC ar fáil ar Instagram, YouTube & Tik Tok. Fáiltíonn BLOC roimh ábhar físe nuálach, spreagúil agus siamsúil dírithe ar lucht féachana óg ós cionn 18 bliana d’aois.
Tá eolas breise ar fáil faoi BLOC ach teagmháil le roisin.ni.thuairisg@tg4.ie
Is féidir comhairle breise maidir le ullmhú iarratais anamúlachta a fháil ó: animation@nationaltalentacademies.ie
LE IARRATAS A DHÉANAMH
BA CHÓIR NA NITHE SEO A LEANAS A BHEITH LE GACH IARRATAS:
- Bíobla Anamúlachta;
- Líne gonta and achoimre a thugann cuntas gearr ar an togra;
- Script as Gaeilge;
- Dearbhú scríofa ón scríobhneoir gur seo obair s’acu féin;
- CV den phríomh fhoireann léirithe (leathanach amháin);
- Briseadh síos ar bhuiséad (10 – 12k)
- Dearbhú ó Léiritheoir Feidhmeannach atá ar bord mar mheantóir (beidh tacaíocht ó animation@nationaltalentacademies.ie le Léiritheoir Feidhmeannach a aimsiú)
Má tá siad ar fáil, is féidir an t-eolas seo a chuir san áireamh freisin: –
- Nasc chuig seó-ríl nó portfóilió;
- Nótaí an Léiritheora (le cur síos ar fís an script & an togra a thabhairt chun críche)
- Nótaí an Stiúrthóra (le cur síos ar fís an script a thabhairt chun beochta).
Ní mór do gach iarratas a chur ar aghaidh go leictreonach ar shuíomh eCoimisiún TG4 roimh Dé hAoine an 30ú Bealtaine 2025. Mura bhfuil an comhlacht cláraithe, caithfear clárú ar dtús ar an suíomh https://ecomm.tg4.ie/ agus an t-iarratas a uaslódáil roimh an sprioc-am tríd an rogha, ‘SPREAG 2025’, ón roghchlár anuas. Tá sé i gceist againn seisiúin cur i láthair a dhéanamh le gearrliosta d’iarrthóirí faoi lár Mhí Meitheamh agus tograí a chur go conradh go luath ina dhiaidh sin.
Tá tacaíocht arb fhiú €240,000 ag an gciste seo. Is comhpháirtíocht í idir TG4, Fís Éireann, ILBF agus Animation Ireland.
Beidh seisiún eolais ar líne ar an Déardaoin 3ú Aibreán dóibh siúd a bhfuil suim acu sa scéim seo.
An online information session will take place via Zoom on Thursday 3 April at 12:30
Is féidir clárú ag cumarsaid@tg4.ie
 |
 |
 |
 |