Rialaigh cúirt sa Fhrainc cosc a chur ar an bpolaiteoir den eite dheis Marine Le Pen a hainm a chur chun cinn i dtoghcháin sa tír sin ar feadh cúig bliana.
Fágann rialú na cúirte nach mbeidh cead aici a bheith ina hiarrthóir i dtoghchán uachtaránachta na Fraince in 2027, mar a bhí ar intinn aici.
Chiontaigh an chúirt Marine Le Pen in airgead a chúigleáil ó Pharlaimint na hEorpa ar son a páirtí, Rassemblement National.
Dúradh gur bhain sí féin agus ochtar eile mí-úsáid as costais na parlaiminte le daoine a íoc as obair a dhéanamh ar son an pháirtí sin seachas mar chúntóirí parlaiminte. €2.9 milliún an tsuim iomlán a bhí i gceist, a dúradh.
Ciontaíodh dháréag eile as coir a cheilt.
Chomh maith leis an toirmeasc toghchán, gearradh ceithre bliana príosúin ar Marine Le Pen.
Cé ea, cuireadh ar fionraí dhá bhliain den téarma sin agus ordaíodh di clib leictreonach a chaitheamh ar feadh an dá bhliain eile i leaba dul sa phríosún.
Gearradh fíneáil €100,000 ar Marine Le Pen leis.
Thug sí le fios go raibh rún aici achomharc a dhéanamh in aghaidh rialú na cúirte.
Nuacht agus Cúrsaí Reatha RTÉ