Séamus Ó Scanláin
Aston Villa agus Crystal Palace a imreoidh a chéile i gceann de chluichí leathcheannais Chorn FA Shasana i mbliana.
Rinneadh an tarraingt níos túisce tráthnóna.
Fuair Villa ó chathair Birmingham an lámh in uachtar ar Preston North End 3-0 inniu.
Chloígh Crystal Palace Fulham inné leis an scór céanna,toradh nach raibh aon tsúil leis a déarfadh go leor.
Sa gcluiche leathcheannais eile don 7ú bliain as a chéile,curiarracht, tá Manchester City.
Casfaidh siadsan ar Nottingham Forest i ndiaidh dóibh Bournemouth a chloí 2-1 inniu.
Imreofar an dá chluiche i Staid Wembley faoi cheann 4 seachtainí, an deireadh seachtaine deiridh de mhí Aibreán.
Tá Corn FA Shasana ar cheann de na comórtais sacair is iomráití ar domhan i gcónaí, cé go bhféadfaí argóint a dhéanamh nach bhfuil an stádas anois aige a bhíodh aige tráth.
I gcead de fhoirne atá sna sraitheanna ísle sa chluiche sacair gairmiúil i Sasana, tagann borradh faoi chomórtas an tséasúir i mí Eanáir.
Is ag an tráth sin a fheictear foirne na príomhroinne agus an dara sraith i mbun iomaíochta, babhta 3 den chomórtas tráth a mbíonn 64 foireann fágtha.
Seans amháin a fhaigheann gach foireann, ag brath ar an tarraingt oscailte bíonn tú ag imirt sa bhaile nó i do chuairteoir ar pháirc an fhreasúra.
Béarlagair coitianta a luaitear leis an gcomórtas is ea 'marú an fhathaigh' nó an 'Giantkilling' nuair a bhuaileann foireann ar bheagán barúla ceann de na piardaí móra.
Agus tá sé tarlaithe agus tarlóidh sé arís.
Eachtra mhór eile a shamhlófar leis an gcomórtas faraor is ea tubaiste 'Leppings Lane' i bPáirc Hillsborough i Sheffield i 1989.
Maraíodh 96 duine sa bhrú bocht a tharla ag tús an chluiche leathcheannais FA sin idir Nottingham Forest agus Liverpool.
Lá dobrónach do phobal Shasana, go speisialta muintir Learphoill.