Ní ghabhfar chun cinn anois leis an obair de réir rialach in ospidéil phoiblí an stáit amárach.
Sin a bhuíochas don socrú a dtángthas air sa Choimisiún um Chaidreamh san Áit Oibre (WRC).
D'éirigh le bainistíocht Fheidhmeannacht na Seirbhísí Sláinte (HSE) agus ceardchumainn na n-oibrithe leighis teacht ar chomhréiteach thar oíche.
'Bhí an idirbheartaíocht casta agus deacair' a deir Príomhfheidhmeannach an HSE,Bernard Gloster 'ach is iad an pobal anois na buaiteoirí i ndáiríre ó tá obair de réir rialach an lae amárach, seachanta'.
Ón lá amárach bhí sé beartaithe ag suas le 80,000 oibrí sna hospidéil feidhmiú de réir rialach.
Aighneas é seo a bhaineann leis an líon foirne atá sa tseirbhís faoi láthair agus ceardchumainn ag maíomh go dteastaíonn breis earcaíochta.
Mar chuid den socrú gealladh athbhreithniú a dhéanamh ar fholúntais sa tseirbhís sláinte phoiblí agus go gcuirfí dlús dá réir leis an bhfoireann leighis a mhéadú.
Ní ghabhfar chun cinn ach oiread Déardaoin seo chugainn, le stailc lae a bhí á beartú ag baill an INMO agus Fórsa in Ospidéal Mhuire Lourdes i nDroichead Átha.
Deir Ard Rúnaí Chumann Altraí agus Ban Cabhrach na hÉireann (INMO),Phil Ní Sheaghdha go gcaithfidh na baill vóta a chaitheamh anois ar na moltaí seo atá tagtha chun cinn ón bplé sa WRC.
'Is faoi na baill ansin é glacadh nó diúltú do na moltaí' a deir sise.
Tá fáilte curtha ag an Aire Sláinte,Jennifer Carroll McNeill roimh an socrú.
'Cinnteoidh sé seo go leanfar le seirbhísí riachtanacha agus go mbeidh an t-othar slán dá réir' a dúirt sí.