Tugadh beirt deartháireacha agus bean os comhair Chúirt Dúiche an Chabháin inniu agus iad cúisithe in ionsaí a dhéanamh ar fhear sna daichidí agus i ndíobháil a dhéanamh dó i mbaile Mhuineacháin Dé Máirt seo caite.
Sin iad Jason Maughan, 25 bliain d'aois, a dheartháir Stephen Maughan, 23 bliain – arb as Mullach Meata i Muineachán iad beirt – agus Molly Roberts, 21 bliain, as an Aonach i gCo Mhuineacháin.
Dúradh sa chúirt gur gortaíodh go han-dona an fear nuair a ionsaíodh é le sclacán cruach i gceantar Bhóthar na Páirce i mbaile Mhuineacháin idir 10 a chlog agus 11 a chlog oíche Dé Máirt.
Dúradh go raibh éirithe idir é agus duine eile, nó daoine eile, sular ionsaíodh é.
Tugadh an fear chuig Ospidéal Mhuire Lourdes i nDroichead Átha ar an gcéad ásc ach aistríodh é go dtí Ospidéal Beaumont i mBaile Átha Cliath, áit a bhfuil fíor-dhrochbhail air.
Dúirt an Bleachtaire-Sháirsint Ciara Hayes sa chúirt gur tháinig Jason agus Stephen Maughan i láthair na nGardaí dá ndeoin féin ar maidin Dé Céadaoin.
Dúradh gur gabhadh Molly Roberts ina dhiaidh sin agus gur tógadh a gluaisteán freisin.
Thug an Bleachtaire-Sháirsint Hayes le fios chomh maith gur dhóichí go gcuirfí cionta níos tromchúisí i leith an triúir amach anseo.
D'ordaigh an Breitheamh Raymond Finnegan na deartháireacha Maughan a chur siar faoi choinneáil agus a dtabhairt os comhair Chúirt Dúiche Mhuineacháin ar nasc físe Dé Luain seo chugainn.
Cheadaigh sé bannaí do Molly Roberts faoi réir dianchoinníollacha agus d'ordaigh í a thabhairt os comhair Chúirt Dúiche Mhuineacháin Dé Luain seo chugainn chomh maith.
Nuacht agus Cúrsaí Reatha RTÉ