Tá 350 oibrí le ligean chun siúil ag an miondíoltóir faisin New Look atá le tarraingt amach as Poblacht na hÉireann.
D'iarr úinéirí New Look ar an Ard-Chúirt leachtaitheoirí sealadacha a cheapadh ar an ngnóthas agus ceadaíodh an t-iarratas sin inniu.
Dúirt an comhlacht go raibh airgead á chailleadh as éadan ag an ngnó mar gheall ar chomh "dúshlánach" agus a bhí an margadh faisin.
Dúradh freisin gur cuireadh an fhoireann oibre ar an eolas a luaithe a ceapadh na leachtaitheoirí sealadacha, Shane McCarthy agus Cormac O'Connor ó KPMG.
Tuigtear go bhfuil sé i gceist ag na húinéirí labhairt leis an bhfoireann arís as seo go ceann cúpla lá agus tús a chur le próiseas comhairliúcháin ina dhiaidh sin.
Tá 347 duine fostaithe ag New Look in 26 siopa ar fud an Stáit.
Siopaí beaga agus meánmhéide is ea a bhformhór agus dháréag nó mar sin ar an meán atá ag obair i ngach aon cheann acu.
Nuacht agus Cúrsaí Reatha RTÉ