Tar éis bháis tá iar-Easpag Dheoise Chill Dalua Willie Walsh. Bhí sé 90 bliain d'aois.
Tuigtear gur cailleadh an tEaspag Walsh go tobann aréir ina theach cónaithe in Inis i gCo an Chláir.
Deirtear go raibh an tsláinte go maith ag an easpag tríd is tríd agus bhí sé i láthair ag Aifreann speisialta in Ardeaglais Inse le gairid lena bhreithlá a cheiliúradh.
Ba as Ros Cré i gCo Thiobraid Árann ó dhúchas Willie Walsh.
D'fhreastail sé ar Choláiste Fhlannáin in Inis, áit a raibh sé ina scoláire cónaithe, agus fuair sé léann sagairt i gColáiste Phádraig i Maigh Nuad ina dhiaidh sin.
Ina dhiaidh sin arís, chaith sé 25 bliain ag múineadh mata agus fisice i gColáiste Fhlannáin.
I 1994 a hoirníodh é mar Easpag Chill Dalua agus bhí an cúram sin air nó gur éirigh sé as in 2010.
Gaeilgeoir ab ea Willie Walsh, agus chloistí agus d'fheictí é go minic ar an raidió agus ar an teilifís ar feadh mórán bliain.
Dúradh riamh faoi gur dhuine fial mánla ab ea é agus go deimhin ba é Cinéaltas Chríost an mana Easpagóideach a bhí aige.
Dúirt Easpag Chill Dalua Fionntán Ó Monacháin gur méala mór bás Willie Walsh don phobal.
Ba fear é Willie Walsh, arsa an tEaspag Ó Monacháin, a chuaigh i gcion thar an gcoitiantacht ar dhaoine eile.
Nuacht agus Cúrsaí Reatha RTÉ